უკვე დიდი ხანია, რაც უნივერსიტეტს "ცვლილების ტალღამ" გადაუარა. ასე ვთქვათ, იცვლება ყველა და ყველაფერი, რაც მოძველდა და წარსულს ჩაბარდა. რამდენადაც სამწუხარო არ უნდა იყოს, ამ ცვლილებებს გაჰყვა სტუდენტების სტიპენდიებიც. დღეს თითქმის ყველა სტუდენტს უჩნდება კითხვა იმის შესახებ, თუ რატომ გააუქმეს ან რატომ შეჩერდა სტიპენდიების გაცემა. ნუთუ უნივერსიტეტს ძალიან ძვირი უჯდებოდა წარჩინებული სტუდენტების წეხალისება და მათი შრომისთვის საფასურის გადახდა. თუ უნივერსიტეტი ცოდნის მიღების წყაროა, სადაც ახალგაზრდა ყალიბდება და სტუდენტის სტატუსს იძენს, შესაბამისად, სასწავლებელი სწორედ სტუდენტს ეკუთვნის, ამიტომ ყველა საჭირბოროტო საქმის გადაწყვეტა, სწორედ თითოეული მათგანის მოსაზრების გათვალისწინებით უნდა მომხდარიყო. მაგრამ ის ფაქტი, რომ სტუდენტთა უმრავლესობა გაურკვეველ მდგომარეობაშია, ცხადყოფს, რომ საკითხის გადაჭრა ერთპიროვნულად მოხდა. სტიპენდიების გაცემის შეჩერება, მართლაც, რომ საჭირბოროტო საკითხია და შესაბამისად, პირველ რიგში, სწორედ სტუდენტების აზრი უნდა იყოს ჩვენთვის მისაღები და საინტერესო. უნივერსიტეტის მაშტაბით, მართალია, მცირე რაოდენობის სტუდენტი გამოიკითხა, თუმცა თითოეული მათგანის მოსაზრება ცხადყოფს, რომ ყველა ერთ აზრზეა: ყველა ეწინააღმდეგება სტიპენდიების გაუქმებას.
გიორგი თავიშვილი, ეკონომიკის ფაკულტეტი:
- პირადად მე გული მწყდება, რომ სტიპენდიები მოიხსნა. მოგეხსენებათ, რომ შრომას და სწავლას უნივერსიტეტის მხრიდანაც მცირეოდენი დაფასებაც სჭირდება. დაფასება შეიძლება მაღალი ნათქვამი გამომივიდეს, მაგრამ კარგია, როდესაც ხედავ, რომ ღამეებს ათევ, სწავლობ, შრომობ და ამისთვის შესაბამის საზღაურსაც იღებ. მე ძალია დიდი იმედი მაქვს, რომ უნივერსიტეტი მის ხელთ არსებულ ფინანსებს სტუდენტებისთვისაც გაანაწილებს.
ლიკა ბაქანიძე, სოციალურ-პოლიტიკური ფაკულტეტი:
- ჩემი აზრით, სტიპენდიები არ უნდა გაუქმდეს. მართალია, პირველი წელია, რაც უნივერსიტეტში ვარ და ზუსტად ვერ გეტყვით, რა რაოდენობის თანხების გაცემა ხდებოდა თითოეულ სტუდენტზე, მაგრამ რამდენიც არ უნდა ყოფილიყო, ეს ერთგვარი სტიმულია სწავლის გაგრძელებისთვის.
ანა დემენტევი, სოციალურ-პოლიტიკური ფაკულტეტი:
- მე არ ვიცი, სხვას ამასთან დაკავშირებით რა მოსაზრება გააჩნია, მაგრამ ერთი კი ნათელია, სტიპენდია სტუდენტისთვის ყოველთვის იყო სტიმულის და წახალისების წყარო და მე დიდი იმედი მაქვს, რომ ეს უბრალო გაუგებრობაა და უნივერსიტეტი შეძლებს მთლიანად თუ არა, სანახევროდ მაინც გასცემს წარჩინებულ სტუდენტებზე სტიპენდიებს.

კახაბერ ლორთქიფანიძე, იურიდიული ფაკულტეტი.
- ერთადერთი, რაც შემიძლია გითხრით, ის არის, რომ ნამდვილად დიდი უსამართლობა იქნება, თუ სტიპენდიები საერთოდ გაუქმდება. თუ ძალიან გვინდა, რომ ჩვენი სწავლის პროგრამა ევროპის დონეზე მივიყვანოთ, მაშინ ისიც უნდა გავითვალისწინოთ, რომ საზღვარგარეთის სასწავლებლებში არსებობს ე.წ წამახალისებელი სტიპენდიები. Aასე, რომ თუ ჩვენთანაც იგივე იქნება, არამგონია ვინმემ პრეტენზია გამოთქვას.

სანათა ჩარგაზია, სოციალურ-პოლიტიკური ფაკულტეტი:
- ჩემი აზრით, ყველა ნორმალურ უნივერსიტეტში უნდა არსებობდეს სტიპენდია. ზოგისთვის, ეს შეიძლება ძალია მნიშვნელოვინიც იყოს. ამბობენ სტიპენდიები გაუქმდაო, მაგრამ არავინ იძახის სად წავიდა და რაში დაიხარჯა ეს თანხა ანუ ყოველგვარი ახსნა-განმარტების გარეშე გვითხრეს, რომ სტიპენდიები არ იქნებოდა, რაც უსამართლობაა. თუ გვეცოდინება, რომ სტიპენდიებისთვის განკუთვნილი თანხა ჩემი უნივერსიტეტის გაუბედურებული აუდიტორიების შეკეთებას მოხმარდება, პირადად მე ვიქნები პირველი, ვინც მხარს დაუჭერს ამ წამოწყებას. მე შემიძლია ვთქვა, რომ ძალია ბევრი ლექცია "სოროებში"’ გვიტარდება და არა აუდიტორიებში.