ნანა ჭიღლაძე, კონსტიტუციური სამართლის ლექტორი: გაზეთს, რა თმა უნდა, ვეცნობი. გისურვებთ წარმატებებს და ასევე გისურვებთ, რომ გქონდეთ ძალა, რეალურად ასახოთ ფაკულტეტზე მიმდინარე მოვლენები. რეალურად ასახოთ სტუდენტური აზრი.

დავით ბოსტოღანაშვილი, იურიდიული ფაკულტეტის ადმინისტრაციის ხელმძღვანელი: თქვენს გაზეთს დროის ფაქტორის გათვალისწინებით, შეძლებისდაგვარად ვეცნობი. მასში ასახულია სტუდენტის თვალით დანახული მოვლენები და ამ კუთხით ის ძალიან საინტერესოა. გაზეთი, რაც არ უნდა კარგი იყოს, სასურველია, რომ მაინც უკეთესი იყოს. ასე რომ გისურვებდით უკეთესობისაკენ შეცვლილიყოს თქვენი გაზეთი.

მერაბ ტურავა, სისხლის სამართლის ლექტორი: მე, როგორც ვიცი, გაზეთ `ახალგაზრდა იურისტს” ათი წელი შეუსრულდა და უპირველესად, გილოცავთ ამ საიუბილეო თარიღს. მე მახსენდება ჯერ კიდევ 90-იან წლებში ამ გაზეთის დაარსების, ჩამოყალიბებისა და განვითარების ისტორია. მე ვერ ვიტყვი, რომ აქტიურად ვთანამშრომლობ ამ გაზეთთან, მაგრამ ვადევნებ თვალყურს გაზეთში გამოქვეყნებულ სტატიებს. ვფიქრობ, რომ ამ გაზეთს ყველამ უნდა დავუჭიროთ მხარი და ხელი შევუწყოთ – უფრო მეტად განვითარდეს. არაერთი საინტერესო სტატია და ინფორმაცია გამოქვეყნებულა ამ გაზეთის ფურცლებზე. იმედი მაქვს და გისურვებთ, რომ გააგრძელოთ აქტიური, საინტერესო, ნაყოფიერი და ინტენსიური მოღვაწეობა. `ახალგაზრდა იურისტს” ვუსურვებდი განეხორციელებინოს ყველა დასახული ამოცანა. მნიშვნელოვანია, როდესაც სტუდენტებს აქვთ ბეჭდვითი ორგანო და გაზეთის მეშვეობით შეუძლიათ დააფიქსირონ თავიანთი პოზიცია და შეხედულებები. ეს, რა თქმა უნდა, კარგია. ერთი მხრივ, ისინი სწავლობენ პრესასთან ურთიერთობას, პრესაში თავიანთი აზრის დაფიქსირებას, აგრეთვე აქვთ საშუალება, გაეცნონ ამა თუ იმ საკითხზე თავიანთი თანატოლებისა თუ ლექტორთა შეხედულებებს. ის, რომ ეს გაზეთი დღეს ისევ არსებობს, ეს უკვე ბევრისმეტყველია. თავის დროზე სწორი იყო ამ გაზეთის ჩამოყალიბებისა და შექმნის იდეა. ვფიქრობ, რომ ყველამ ერთად, ამ გაზეთს და ამ გაზეთში მოღვაწე სტუდენტებს, კიდევ მეტად უნდა შევუწყოთ ხელი.

გიორგი გორაშვილი, სისხლის სამართლის ლექტორი: ძალიან კარგია, რომ არსებობს სტუდენტური გაზეთი. გისურვებთ უფრო მეტ მაშტაბებს, უფრო მეტად ყოფილიყავით ცნობილი. ვფიქრობ, რომ თქვენი გაზეთი საზოგადოებაში იმდენად არ არის ცნობილი, რამდენადაც ამის შესაძლებლობა გაქვთ. გირჩევთ, საზოგადოებრივი პრობლემები სამართალთან მიმართებაში უფრო მეტად ასახოთ, სამართალთან დაკავშირებული თქვენი შეხედულებები მიაწოდოთ საზოგადოებას და თქვენი აზრი საზოგადოებისათვის იქნება გარკვეული კრიტერიუმი. გილოცავთ იუბილეს და გისურვებთ წარმატებებს.

თამარ ჩიტოშვილი, ასოცირებული პროფესორი: ამ გაზეთს ვეცნობი, ყოველთვის არა, მაგრამ ხშირად. კარგი გაზეთია, საინტერესოა თემატიკის მიხედვით და არა მარტო თემატიკით, აგრეთვე საინტერესოა სტატიების შინაარსით. გაზეთს ვუსურვედი ხანგრძლივ შემოქმედებით საქმიანობას. ვუსურვებდი, ძალიან ბევრ მკითხველს არა მხოლოდ უნივერსიტეტის ფარგლებში, არამედ მის გარეთაც. მე მე მიხდება თსუ-ის ფილიალებსა თუ სხვა სასწავლებლებში სტუდენტებთან შეხვედრა და ისინი უფრო იცნობენ ამ გაზეთს. ამასთანავე ცდილობენ კიდეც ამ გაზეთიდან ბევრი საინტერესო იდეით იმსჯელონ. გისურვებთ ისევ მკითხველის ფართო აუდიტორიას და გილოცავთ იუბილეს.
გურამ ნაჭყებია, პროფესორი: ვფიქრობ, კარგი გაზეთია. სტუდენტური გაზეთის არსებობა კარგი ტრადიციაა და გისურვებთ გაგეგრძელებინოთ ეს ტრადიცია.
ნონა თოდუა, ასოცირებული პროფესორი: ამ გაზეთს ვუსურვებდი იყოს უფრო კრიტიკული. იყავით უფრო მეტად კრიტიკულები და უფრო მეტად თამამები. თამამად გამოთქვით თქვენი პრეტენზიები არამხოლოდ პროფესორების, არამედ დეკანატის და რექტორატის მიმართ. თქვენი მოსაზრებები იყოს უფრო კონკრეტული. ნუ მოერიდებით კრიტიკას ხელმძღვანელი პირების მიმართ, მხოლოდ იმის გამო, რომ ის ხელმძღვანელი პირია, რადგან როდესაც თქვენ გახდებით მოსამართლეები და პროკურორები, თუ მერეც ასეთი კრიტერიუმით იხელმძღვანელებთ სწორ გადაწყვეტილებას ვერ გამოიტანთ. ეს კრიტიკა, რა თქმა უნდა, არ ნიშნავს დაპირისპირებას რომელიმე პროფესორის მიმართ.