ბოლო პერიოდში, სულ უფრო გახშირდა ცალკეული ტერიტორიებისა და დაწესებულებების პრივატიზაცია. ყიდიან ყველაფერს და ყველგან, ყველანაირად და ყველაზე. გაიყიდა ტყეები, საწარმოო ობიექტების ნარჩენები... ახლა ჯერი სამედიცინო დაწესებულებებზეც მიდგა, რამაც დიდი აჟიოტაჟი გამოიწვია.
განსაკუთრებული ხმაური მოჰყვა ე.წ. მეცხრე საავადმყოფოს შესაძლო პრივატიზაციის შესახებ გავრცელებულ ინფორმაციას. საქმე ის გახლავთ, რომ აღნიშნულ ობიექტს დიდი ისტორიულ-კულტურული ღირებულება აქვს.
მეოცე საუკუნის დასაწყისში, საქართველოს ეკლესიის წმიდა სინოდის გადაწყვეტილებით, საფუძველი ჩაეყარა საეკლესიო-სამონასტრო კომპლექსის მშენებლობას, გრანდიოზულ ნაგებობას, რომელიც მოიცავდა წმ. ანდრეა პირველწოდებულის სახელობის ეკლესიას, სასულიერო სემინარიას და ლაზარეთს, მას მრავალმხრივი დანიშნულება ჰქონდა.
აღსანიშნავია, რომ საეკლესიო-სამონასტრო კომპლექსში განთავსებულ ლაზარეთს ხელმძღვანელობდა მისი იმპერატორ ნიკოლოზ II-ის დედა, მარია ფიოდოროვნა (რომანოვი). ლაზარეთში მოწყალების დებად მონაზვნები მუშაობდნენ.
ყველაფერი იდეალურად იყო მანამ, სანამ მავანთა და მავანთა ბრძანებით, ეკლესიაში წირვა-ლოცვა შეწყდა, გაუქმდა სემინარია და სამონასტრო კომპლექსი ჩვეულებრივ საავადმყოფოდ გადაიქცა. იქ, სადაც წლების განმავლობაში წირვა-ლოცვა აღევლინებოდა, გახსნეს სააქტო დარბაზი. სამონასტრო კომპლექსს ყოველგვარი რელიგიური დანიშნულება ჩამოერთვა.
საბედნიეროდ, ჯერ კიდევ არსებობენ ადამიანები, რომელთაც ქვეყნის ბედ-იღბალი ადარდებთ. ცალკეული პირები დაინტერესდნენ `საავადმყოფოს" ისტორიით. შეიქმნა საინიციატივო ჯგუფი ქალბატონ მანანა ადეიშვილის ხელმძღვანელობით და დაიწყო ამ საკითხის კვლევა. სახელმწიფო-საისტორიო არქივიდან მოძიებული ინფორმაციის გათვალისწინებით, საინიციატივო ჯგუფმა წერილობითი მიმართვა გაუგზავნა საპატრიარქოს. მათი მოთხოვნა მდგომარეობს შემდეგში, რომ მოხდეს საეკლესიო-სამონასტრო კომპლექსისთვის თავდაპირველი ფუნქციების აღდგენა და იგი დაუბრუნდეს თავის ისტორიულ სამართალმემკვიდრეს – საქართველოს საპატრიარქოს.
ეს პრობლემა დიდიხნის მოგვარებული იქნებოდა, რომ არა საქართველოს ეკონომიკური განვითარების სამინისტროს წინააღმდეგობა.

მანანა ადეიშვილი: ეს არის ქართველი ხალხისა და ერის ღირსება. დღეს თუ ეს ტაძარი გაიყიდება, ხვალ გაყიდიან სიონს, ქაშუეთს, სვეტიცხოველს