საუდის არაბეთის მკვიდრს სურს, 10 მლნ დოლარად შეიძინოს ფეხსაცმელი, რომელიც აშშ-ის პრეზიდენტ ჯორჯ ბუშს ესროლეს, იუწყება ტელეარხი Al-Arabia. სკოლის ყოფილი პედაგოგი, 60 წლის მოჰამედ მაჰაფა, რომელიც ასირში დიდი მიწის ფართობის მფლობელია, აცხადებს, რომ მზად არის, ეს თანხა გადაიხადოს მუნტაზირ აზ-ზეიდის ფეხსაცმელში და მას არა მხოლოდ ფეხსაცმელი, არამედ “თავისუფლების ორდენი” უწოდა.

  მისი განცხადებით, ეს ფეხსაცმელი მისი ყველაზე ფასეული ქონება იქნება. - ”ის მთელს ჩემს ქონებაზე ძვირფასია. მას ჩემს შვილებს ვუანდერძებ და მუზეუმში გამოვფენ ამ “თავისუფლების ორდენს”, - განაცხადა მაჰაფამ.

  ”მიმაჩნია, რომ თავისი საქციელით ჟურნალისტმა არაბებს ღირსება დაუბრუნა, რომელიც აშშ-მა არაბულ და ისლამურ ქვეყნებში შელახა, რის შედეგადაც ოკუპირებულია ერაყი და ავღანეთი, დაიღუპა უამრავი უდანაშაულო ადამიანი”, - განაცხადა მაჰაფამ. ადრე, ამ ფეხსაცმლის ყიდვის სურვილი გამოთქვა ერაყის საფეხბურთო გუნდის ყოფილმა დირექტორმა ადნან ჰამადმა და რამდენიმე ერაყელმა ბიზნესმენმა.